Книги по географии для 7 класса на каракалпакском языке.
Aziz oqıwshılar! Siz usı jıldan baslap jańa pán — Geografiyanı úyreniwdi baslaysız. Bul pán ana planetamız — Jer tábiyatı haqqındaǵı bilimlerinińizdi jánede bekkemleydi. Jer betindegi úlken suwlı hám qurǵaqlıqtan ibarat — materikler hám okeanlar, olardıń bólimleri tábiyatı, olarda júz berip atırǵan ózgerisler menen tanıstıradı. Bul sabaqlıqtı oqıw arqalı siz materikler hám okeanlardı úyrengen sayaxatshılardıń iskerligi, túrli materikler klimatı, suwları, tábiyat zonaları, okeanlar hám olardıń úlken bólimleri — teńizler, qoltıq hám buǵazlar tábiyatı menen jaqınnan tanısasız. Olardı biliw, talıqlaw bolsa elimiz tábiyatında baqlanıp atırǵan ózgerislerdi túsiniwińizge, olardı talıqlaw keleshekte Jer beti hám mámleketimiz tábiyatında júz beriwi múmkin bolǵan ekologiyalıq hám geoekolgiyalıq mashqalalardıń aldın alıwǵa tayarlıq kóriwde sizge jolbasshı boladı. Balalar! Siz keleshek izertlewshilerisiz! Tábiyatta júz beretuǵın proceslerdi puxta úyrenip, olardı talıqlaw sızdegi izertlewshilik kónlikpeleriniń bekkemleniwine xızmet etedi. Sabaqlıq bes baptan ibarat. Birinshi bapta geografiya páni hám onıń tarmaqları, áyyemgi hám házirgi zaman geografiyalıq izertlewleri, olardıń mazmunı, zamanagóy geografiyalıq izertlewlerdiń tiykarǵı baǵdarları menen tanısasız.
